*************
SLM SHIN YA HALATTA GA MUTUM YAYI TSATSUBA DAN KARE KANSA.?MISALI KAMAR MASU YIN LAYAR ZANA DA SUKE AMFANI DA ITA DAN SU KUBUTA.

(daga Rukayyah N. shu'aibu)

AMSA
*****
Gaskiya bai halatta ba. Ba ma shi ba, babu wani nau'i na sihiri wanda ya halatta musulmi ya yishi.

Ko da niyyar kare kai, ko kuma da wata niyyar ta daban..

Domin kuwa Allah (saww) yana cewa "ALLAH BA YA GAFARTAWA IDAN ANYI SHIRKA DASHI, AMMA YANA GAFARTA ABINDA YAKE KOMA-BAYAN WANNAN GA WANDA YASO".

Sannan Manzon (saww) yana cewa "KU KIYAYI ABUBUWA GUDA 7 MASU HALAKARWA: sai ya fara da cewa "AL-ISHRAAKU BILLAH".. (hada wani da Allah wajen bauta).

Domin duk wani sihiri da kike jin labarinsa, ko qarami ko babba, ko na alheri ko na mugunta, to ba ya ci sai da sa hannun shaitanun aljannu. Su kuma basu yarda su biya bukatar dan adam, har sai sun tabbatar ya riga ya zama bawansu mai yi musu hidima. Kamar yanke-yanke, ko kuma su sanya shi ya aikata wani Qaton zununbin wanda zai iya kaishi zuwa Kafirci.

Kamar su sanyashi ya rika Fitsari akan Alqur'ani, ko su sanya shi ya dena yin wasu salloli, ko su sanya shi yayi zina da Mahaifiyarsa, ko 'yarsa, ko Qanwarsa. (wal iyazu billah.).

Ya kamata musulmi mu san cewar Manzon Allah (saww) ya gama mana komai tunda ya bar mana Alkur'ani da Sunnoninsa, wadanda suke cike da addu'o'i da azkarai masu fa'idantarwa ako wanne yanayi.

Sannan ga Sunayen Allah nan kyawawa guda 99. Duk wanda mutum ya dauka yake karantawa domin neman biyan wata bukata, to Insha Allah Allah zai amsa masa.

Don haka aguji zuwa wajen 'yan duba da 'yan bori da masu tsatsuba.

Domin yin hakan zai iya kai mutum izuwa rasa imaninsa.

Idan mutum tsari yake nema, gasu Ayatul-Kursiyyi nan da falaki da nasi.

Idan mutum biyan bukata yake nema, ga fatiha nan.

Wallahu A'alam.